Framtidas helseteneste treng portørar!

– Det står utfordringar i kø, men det står òg løysingar i kø, skriv Fagforbundets Iren Luther i høve portørdagen

24.01.2025
Sist oppdatert: 26.01.2025

Sentralt i arbeidet med å organisere framtidas helsetenester er portøren. Fagbrevet gir ein kombinasjon av helsefagleg teori og praktisk oppgåveløysing som betyr at dei er rett person på rett plass veldig mange steder. Mange fleire steder enn portørane jobbar no. Fleksibilitet er ein av grunnsteinane til portørfaget. Det kjem fleire til å få augne opp for i åra framover.

Det er mykje å ta tak i. Budsjetta er stramme, det er utfordringar med å rekruttere helsepersonell samstundes som behovet for helsehjelp aukar. Alt dette til trass så leverer helsepersonell ei helseteneste i verdsklasse. Det er det lett å gløyme, men det er faktisk noko av det aller viktigaste. Pasientar, brukarar og pårørande får god og trygg hjelp.

Me har alle føresetnadar for å klare å møte desse utfordringane, men då må ein unngå å bli handlingslamma, og ein må sjå etter dei gode løysingane. Eit av dei viktigaste premissa for dette er noko me har lang tradisjon på i Noreg: samarbeid.

No er tida for å vere nysgjerrige og utforskande. Å utfordre etablerte «sanningar» som kanskje ikkje er basert så mykje på faglege vurderingar som ein har trudd. Portørane er ei av dei gruppene som fleire  har fått augne opp dei siste åra. Stadig fleire leiarar i sjukehus ser at det er mange oppgåver desse logistikk- og forflytningsekspertane kan brukast til. Somme stader har ein og begynt å bruka portørar meir i kommunehelsetenesta.

Eg trur at framtida til den offentlege helsetenesta er lys. Det står utfordringar i kø, men det står òg løysingar i kø, om ein berre tør å gripe dei. Å bruke portørane og deira kompetanse betre, meir og på fleire plassar er ei av desse løysingane som me må gripe.

Gratulerer så mykje med portørdagen!